آنستي العزيزة..
نصائحي لك عند أي عزومة ..
· الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا
· العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري ... أوعي .. العيش بيتقطع بالسكينة ف الطبق .. وبعدين تاخدي لقمة .. لقمة .. بالعافية .. قال يعني نفسك مسدودة .. اضغطي على أعصابك جدااا وبعدين لما تروَّحي .. إبقي حِفِّي زي مانتِ عايزه ... أهلك اهم عارفين انك طفسه ومش هيفضحوكى
· الشوووربة.. أبوس كعب رجلك .. بند الشوربة ده مهم جدًاااا.. الشوربة تتشرب من غير صوت خالص .. ومن غير ماتقعدي تنفخي فيها .. زي القهوجي اللي بينفخ ف الحجر للزبون .. وطبعًاااااا عايزك تنسى تمامًا ... السلطانية اللي بتقيميها على بقك ف البيت.. وتدلدقي على روحك ... بالمعلقه وبدون صوت .. سخنة ولعة برضه بدون صوت .. وتسيبي تلت الطبق ع الأقل .. مش تميليه.. عشان تلهطيها لآخر نقطة ......
· الرز طبعاً ... بيتاكل بالشوكة .. أوعي إيدك تتمد ع المعلقة .. وتغرفي من طبق الرز وتعبي .. إوعي ...... الرز بالشوكة .. وكأنك بتبوسيه مش بتاكليه ...
· المكرونة ... الاسباجيتي .. برضه بالشوكة .. تتلف على طرف الشوكة .. لحد ما تخلص وبعدين تحطيها ف بؤك من سكات .. مش تشفطي المكرونة عود عود وتبهدلى خلقتك ويبقى منظرك زبالة .... خلى دا بعدين لما الزبون ينطس ف نظره ويجوزك ... ويلاقى نفسه قدام الأمر الواقع ....
· السمك .. مشكلة ... شوفي .. بتفصلي اللحم عن الشوك .. إزاي ..؟ تقطعي اللحم من النص .. بالطول وبعدين تفردي اللحم ع الجانبين. ولما تخلصي ناحية .. متقلبيش السمكة .. بلاش فِلح .. شيلي السلسلة بالشوكة والسكينة وحطيها ف جنب الطبق وكملي أكل النص التاني .. وبدل الفيلم الهندي ده .. نصيحة .. ماتكليش السمك خالص .. قولي مابحبش السمك وخلصي نفسك
· الجمبري .. دا يعنى اذا كنتي عارفاه ... أول ماطبق الجمبري ينزل .. بصيله بقرف واحتقار شديدين .. آل يعني زهقانة من كتر أكل الجمبري الجامبو ف بيت بابّااااا.. وأتنهدي جامد وقولي .. برضه ..؟ وتروحي قاطعة راس الجمبريياية ... بالشوكة .. أنا ف عرضك إنسي المصمصة دلوقت ....
· البطاطس سواء مسلوقة أو محمرة .. أوعي تهرسيها وتدبيها ع الرز وتدي ... لا.. لآ... لآ... بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي ....
· الفاكهة .. لو الفاكهة فيها بذر .. طلعيه من بؤك بالراحة وحطيه ف إيدك وهي مقفولة .. وبعدين فى طفاية السجاير اللي ع الترابيزه .. أوعي ياحبيبتي من نظام التفتفة للبذر .. إنسي .....
ولما تخلصي أكل تحطي إيدك على بطنك ... اللي عصافيرها بتصوصو من العينات اللي كلتيها ... وتقولي له مش ممكن .. أنا عمري ما اتفجعت كدة .. أنا أودامي أسبوع .. هابطل أكل فيه .....
وبعدين تمسكي الفوطة اللي دايمًا موجودة ع التربيزة من غير لازمة ... وتبوسيها... آل يعني بتمسحي بؤك ... وبعدين تستأذني منه لدخول التوليت لإصلاح ماكياجك ...
وتخشي التواليت وتطلعي من شنطة إيديك .. لفة الفول والطعمية اللي جايباها معاكي ... وبالهنا والشفااااااااااااا
الخميس أكتوبر 14, 2010 4:12 am من طرف تكفون نسوني غلاه
» فكاهة مصرية
الإثنين أبريل 12, 2010 4:03 am من طرف body 1992
» اضحك من قلبك
الإثنين أبريل 12, 2010 3:31 am من طرف body 1992
» اضحكو شوي معنا هههههه
الأربعاء مارس 17, 2010 12:43 am من طرف admin
» نكــــــــــــــــــــــت
الثلاثاء مارس 16, 2010 1:40 am من طرف sabee7
» من هم الايمو؟؟.... لمن لا يعرف
الثلاثاء مارس 16, 2010 1:38 am من طرف sabee7
» 100 $ لمن يعرف الحل
الثلاثاء مارس 16, 2010 1:36 am من طرف sabee7
» حيوان اقوى من الجن سبحان الخلاق العظيم
الأحد مارس 14, 2010 2:04 am من طرف sabee7
» اللعبة الاكشن و الاثارة الرائعة dark sector 2009 بروابط mediaifre
الخميس سبتمبر 17, 2009 4:51 pm من طرف mohabo